Rom 3 | NdeIBE | STEP | Pho yibungcono bani obukhona ekubeni ngumJuda, loba ligugu bani elikhona ekusokeni na?

Romans 3

Ukuthembeka KukaNkulunkulu

1 Pho yibungcono bani obukhona ekubeni ngumJuda, loba ligugu bani elikhona ekusokeni na? 2 Kukhulu ngezindlela zonke. Okokuqala baphathiswe wona kanye amazwi kaNkulunkulu.

3 Kuba njani uma abanye babo babengelakholo? Ukungabi lokholo kwabo kuzachitha ukuthembeka kukaNkulunkulu na?

4 Akunjalo. UNkulunkulu kabe qotho, umuntu wonke abe ngumqambi wamanga. Njengoba kulotshiwe ukuthi: “Ukuze ubonakaliswe ukuthi uqondile lapho ukhuluma njalo unqobe lapho usahlulela.”

5 Kodwa uma ukungalungi kwethu kusenza ukulunga kukaNkulunkulu kucace kakhulu, thina sizakuthini na? UNkulunkulu kalunganga ngokwehlisela ulaka lwakhe phezu kwethu na? (Mina ngikhuluma njengokubona komuntu.)

6 Ngempela akunjalo. Aluba kwakunjalo uNkulunkulu ubengawahlulela kanjani umhlaba na? 7 Omunye angaphikisa athi, “Uma amanga ami ekhulisa ubuqotho bukaNkulunkulu ngalokho andise udumo lwakhe, kungani ngijinge ngilahlwa njengesoni na?” 8 Kungani singathi – njengoba sigconwa kuthiwa sitsho njalo futhi abanye bathi sitsho njalo “Kasenzeni okubi ukuze kuvele okulungileyo na?” Ukulahlwa kwabo kufanele.

Kakho Olungileyo

9 Pho sizaphetha ngokuthini na? Kambe sesingcono na? Hatshi akunjalo! Sesitshilo ukuthi umJuda lowezizwe bonke ngokufanayo bangaphansi kwesono. 10 Njengoba kulotshiwe ukuthi: “Kakho olungileyo, kakho loyedwa;

11 Kakho ozwisisayo, kakho odinga uNkulunkulu.

12 Bonke baphambukile, bonke kabasasizi ngalutho; kakho owenza okuhle, kakho loyedwa.”

13 “Imiphimbo yabo ingamangcwaba avulekileyo; izindimi zabo zisebenza inkohliso.” “Ubuhlungu bezinhlangwana busezindebeni zabo.”

14 “Imilomo yabo igcwele ukuthuka lentukuthelo.”

15 “Izinyawo zabo zilesiqubu ekuchitheni igazi;

16 incithakalo losizi kuphawula izindlela zabo,

17 indlela yokuthula kabayazi.”

18 “Ukumesaba uNkulunkulu akukho emehlweni abo.”

19 Siyakwazi ukuthi loba kuyini okutshiwo ngumthetho, ukutsho kulabo abangaphansi komthetho, ukuze imilomo yonke ithuliswe lomhlaba wonke ube lomlandu kuNkulunkulu.

20 Ngakho-ke kakho okuzathiwa ulungile emehlweni akhe ngokugcina umthetho; kodwa ngomthetho siba lakho ukwazi isono.

Ukulunga Ngokukholwa

21 Kodwa khathesi ukulunga okuvela kuNkulunkulu, ngaphandle komthetho, sekwazisiwe, njalo kwafakazelwa nguMthetho labaphrofethi. 22 Ukulunga lokhu okuvela kuNkulunkulu kufika kubo bonke abakholwayo ngokukholwa kuJesu Khristu. Akulamehluko,

23 ngoba bonke bonile njalo bayasilela enkazimulweni kaNkulunkulu, 24 njalo benziwa babe ngabalungileyo ngesihle ngomusa wakhe ngensindiso eyeza ngoKhristu uJesu.

25 UNkulunkulu wambeka njengomhlatshelo wenhlawulo, ngokukholwa egazini lakhe. Wenza lokhu ukuze abonakalise ukulunga kwakhe, ngoba ngokubekezela kwakhe wayekela izono ezenziwe ngaphambili kungekho kujeziswa –

26 wakwenzela ukubonakalisa ukulunga kwakhe ngalesisikhathi, ukuze abe ngolungileyo njalo onguye obenza babe ngabalungileyo labo abakholwa kuJesu.

27 Pho kungaphi ukuzincoma? Kutshiywe ngaphandle. Ngasimiso bani na? Esokugcina umthetho na? Hatshi, kodwa kwesokukholwa.

28 Ngoba siyaqinisa ukuthi umuntu ulungiswa yikukholwa langaphandle kokugcina umthetho.

29 UNkulunkulu unguNkulunkulu wama-Juda kuphela na? KasuNkulunkulu wabezizwe njalo na? Ye, ungowabezizwe futhi, 30 njengoba uNkulunkulu emunye kuphela, ozalungisa abasokileyo ngokukholwa labangasokanga ngakhonalokho ukukholwa kuye. 31 Pho, siyawuchitha umthetho ngalokhukukholwa na? Hatshi, akunjalo! Kodwa, okuyikho yikuthi umthetho siyawusekela.